By Kaimana Barcarse
Ua holo ka hui ʻelua o ka huakaʻi holo a puni ka honua mai Tautira ma Tahiti mokupuni a i Pagopago ma Samoa ʻAmelika, a ua kapa ʻia e nā holokai, He Huakaʻi Kūpaianaha. He ʻumikūmāono paena, a he ʻelua kaukani mile a ʻemi iki mai kai holo ʻia ma kēia māhele o ka Holo A Puni Ka Honua. Ua ʻike ia nā mea kūpaianaha he nui. A ua hoʻokipa ʻia mākou e nā kānaka a me nā ʻohana ʻoluʻolu loa, a ʻo kekahi mea i pā loa ai ka naʻau, ʻo ia hoʻi, i ka hōʻea ʻana aku i nā mokupuni, ʻo ka ʻōlelo i lohe mau ʻia, ʻo ia hoʻi, "Aloha, ua hoʻi mai i kou home aloha nei". A ua ʻike koke ka naʻau i ka pilina ʻohana o kākou he ʻohana koko ʻiʻo nō. Ua pili maoli ma ke ēwe i nā kūpuna.
ʻAʻole i lawa nā ʻaoʻao o kēia makasina nei e wehewehe aku ai i nā moʻolelo kūpaianaha a pau o kēia huakaʻi, akā e kaʻanalike aku kēia iā ʻoukou i kekahi moʻolelo liʻiliʻi i pili i kēlā moku kēia moku i kipa ʻia mai koʻu kuanaʻike kuleana ʻo ia ka hoʻokele, ka hoʻonaʻauao, ka loina, a me ka paʻikiʻi.
Ua hōʻea mākou ma Tautira, kahi i hoʻomaka kūhelu ai ko mākou huakaʻi holomoana. Ua hoʻokaʻawale a hoʻonohonoho ʻia mākou me nā ʻohana o ia kauhale, a mālama ʻia mākou ma ko lākou mau home me he ʻohana lā. A ma ka haʻalele ʻana, ua ʻike ʻia, he ʻohana nō. Mai kēia mua aku, ke hoʻi mākou i ia ʻāina, ʻo ia ko mākou ʻohana maoli e noho ai. Ua kahe piha ka wai aloha. I ka haʻalele ʻana iā Tautira, ua hui pū ka waʻa ʻo Faafaite me mākou a ua holo pū a hiki loa i Rarotonga.
Ma Moʻorea, ua ʻike mākou i ke koʻikoʻi o ka hōʻike ʻana i nā kūpuna o nā mokupuni i kipa ʻia, ʻo wai mākou, a e hōʻike ʻia ma o ke oli ʻana i ka moʻokūʻauhau o Hōkūleʻa. Ua mālie ka holo ʻana a i ia mokupuni, eia naʻe ʻoiai ʻaʻole mākou i hōʻike i nā kūpuna o ia mokupuni ʻo wai mākou, ua pā ikaika mai ka makani i ko mākou pae ʻana, a ua aʻo ʻia ka haʻawina o ka hoʻokamaʻāina mua ʻana aku ma o ke oli. ʻO kekahi o nā mea kūpaianaha i ʻike ʻia ʻo ia hoʻi ka pūnāwai kū i ka wā i inu ai mākou i ka wai ʻono, a me ka wehewehe ʻia o ke kino o ka heʻe e moe ana ma nā kualono o nā kuahiwi o ia moku. Aia ka pū o ka heʻe ma ke kuahiwi o waena, a ʻo nā ʻaweawe, aia ma nā kualono o nā kuahiwi ʻewalu aʻe e kīkoʻo kuhi ana i nā mokupuni koʻikoʻi o Polenekia, ʻo Hawaiʻi ʻoe, ʻo Rapanui ʻoe, ʻO Samoa ʻoe, ʻO Aotearoa ʻoe, a pēlā hou aku.
ʻO Taputapuatea kahi i pae aku ai mākou ma ka mokupuni ʻo Raiatea. ʻO ka heiau ʻo Taputapuatea ka piko o Kahiki mā, a kahi i mālama ʻia ai he mau ʻahu, a ʻo ka ʻahu no Hōkūleʻa, aia ma ia wahi kapu loa. Ma ka pae mua ʻana, ua aʻoaʻo ʻia mākou no ke kiʻi ʻāpana koʻa mai loko o ke kai ma mua o ka hehi ʻana ma ka ʻāina māloʻo. A ua mālama mākou i ia ʻāpana koʻa a ma mua pono o ko mākou haʻalele ʻana i ia mokupuni, ʻo ia ʻo ia ka wā a mākou i kau ai i ia mau pōhaku ma ka ʻahu no Hōkūleʻa, ka ʻahu hoʻi e hoʻopili loa ʻana a pili ʻo Hawaiʻi me Raiatea.
Ma ka hōʻea ʻana i Huahine, ua pae mua mākou ma Haapu, he wahi mana loa i kahukahu pono ʻia e kona poʻe. Ma laila i lula ʻia lākou ma o ka ʻōnaehana "Rāhui", ʻo ia hoʻi nā lula o ka wā kahiko. No ka holoholo ʻana ma kai, ka mahi ʻana ma kula, a me ka ʻaluʻalu ʻana ma uka, ʻo nā loina kahiko nā mea i hahai ʻia, a inā aʻe kekahi o ia wahi a i ʻole kekahi o waho i ia mau kapu, ʻo ka hopu ʻia o nā pono ka mea i hana ʻia, ʻo ka moku ʻoe, ʻo ke kalaka ʻoe, ʻo nā ponohana ʻoe a pēlā aku. Pēlā i kiaʻi ʻia ai nā waiwai o ia ʻāina i lako mau no kona poʻe.
ʻElua paena ma Tahaa, ʻo ka mua, he kipa pōkole ia ma ka motu o waho, a laila ua noho ma kauhale me ka poʻe o laila. He kipa pōkole ia, ma lalo o ka lā piha, akā ua pili pono mākou me ka poʻe o laila, a ua hoʻomākaʻikaʻi ʻia mākou i kahi koena heiau o ka kupua ʻo Hiro, ko lākou kūpua i like kona kūlana me ko Māui ma Hawaiʻi nei.
ʻO Borabora kahi kaulana no ka poʻe mākaʻikaʻi e kipa ʻana i Polapola mā. A ʻo ka wai o ia moku he mea koʻikoʻi. A no ia kumu, ua hoʻokolohua lākou i ka hoʻomaʻemaʻe ʻana i ka wai lepo a me ka wai pīlau i lilo i wai palekana no ka hoʻohana ʻia ʻana. Ua ʻōlelo ʻia, ua hiki ke inu ʻia ia wai, akā hoʻohana ʻia nō no ka mahiʻai ʻana a me ia ʻano hoʻohana ʻoihana. No ka wai inu, ʻo kekahi ʻenehana hou, ʻo ia ka wehe ʻana i ka wai maoli mai ka wai kai, a he wai inu nō ia.
ʻO ko mākou paena ma Maupiti, ka paena mua loa no Hōkūleʻa ma ia moku kū i ka wā. He paʻakikī ke komo ʻana ma ke kowā o ka papapa, akā ma o ka mālama ʻana i nā loina kūpono, a me ke kau ʻana ʻo kekahi aliʻi o ia moku ma ka waʻa ma mua o ke komo ʻana, ua hōʻea palekana. Ma laila i hōʻike ʻia mai ko lākou pili iā Hawaiʻi ma o ke aliʻi ʻo "Rihoriho" i kipa aku i ko lākou ʻāina, ʻo Liholiho ia iā mākou. Ua komo mākou ma ka "holoholo pōhaku", he hanana lawaiʻa i mālama ʻia he hoʻokahi manawa o kēlā me kēia anahulu makahiki. He hana ia i alu loa ai ka poʻe a pau o ia mokupuni, he kūpaianaha maoli nō!
Ma ka hōʻea ʻana ma ka hema ʻo Mitiaro, ua komo mākou ma kekahi ʻino nui. He ʻumikūmālima a i ka ʻiwakālua kapuaʻi ke kiʻekiʻe o nā ʻale a me nā nalu poʻi, a he kanalimakūmālima mile o ka holo ka holomāmā o ka makani. Ua like loa ia me ka holo ʻana ma ʻAlenuihāhā ma Hawaiʻi nei. A no ia kumu, ua holo mākou a i ka ʻaoʻao makani ʻole o Atiu e kali ai a ʻemi hou mai ka ʻino i hiki ke hoʻomau aku. Ua palekana mau, a ua paʻa pono loa ʻo Hōkūleʻa. Ua mālama maikaʻi ʻia mākou.
Ua hōʻea mākou ma Rarotonga, a ua mālama maikaʻi ʻia mākou e ka ʻohana aliʻi Napa, ka ʻohana o ka hoʻokele Pwo ʻo Tua Pittman, a me nā holokai o Marumaruatua. Ua kipa mākou i ka marae o ka ʻohana Paoa, kekahi o nā pilina koʻikoʻi i Hawaiʻi nei. A ua ʻike ʻia ka nui aloha o ka poʻe i ko lākou ʻāina, keu aku ma ka nīnauele ʻana i ke Kuhina Nui o Rarotonga. Ua hōʻike mai ʻo ia no kona hoʻokaʻawale ʻana i nā māhele kai he nui i lilo i wahi palekana mai ka hana lawaiʻa no ko waho poʻe, a me ka hōʻemi ʻana i ke kaukaʻi nui ma ka ʻaila kakalina. He mau hana i pono ai ka mālama ʻana i ko lākou ʻāina a me ko lākou nohonoa no nā hanauna a hanauna aku.
Ma ka pae ʻana i Aitutaki, ua alakaʻi ʻia mākou ma kekahi pōkahu kūikawā me ke kuhi ʻana he pono ka hehi ʻana ma luna o ia pōhaku ma ka pae mua ʻana i laila i ʻike ʻia ua hōʻea, a laila, lilo mākou i kupa o ia ʻāina. Ua like ka hana i ko mākou haʻalele ʻana iā laila kekahi. Ua ikaika ka pilina ʻohana o Aitutaki me Hawaiʻi ma o nā ʻohana ʻo Alapaʻi a Kanakaʻole, a ua kū haʻaheo nā ʻohana e hōʻike ʻana i ko lākou pili iā Hawaiʻi.
Ma ka pae ʻana i Taʻu, ʻOfu, a ʻOlosenga, ua kō ke kuleana o kekahi o ko mākou poʻe holokai ʻo Celeste Manuia-Haʻo e hoʻi i kona ʻāina kūlāiwi ma luna o ka waʻa o nā kūpuna. Ua koi ʻia e kona kupunakāne, e hoʻi i kona ʻāina a aʻo aku i ka poʻe o laila i ka hana hoʻokele a holokai i aʻo ʻia iā ia ma Hawaiʻi. ʻO ia mau mokupuni, nā mokupuni i kaulana no nā ēwe aliʻi o nā Kāmoa.
ʻO Pagopago ma Kāmoa ʻAmelika ka paena hope no mākou ma kēia ʻāpana o ka Holo A Puni Ka Honua. E like me nā wahi ʻē aʻe, ua hoʻokipa maikaʻi loa ʻia mākou, a ua pā maoli ka naʻau ma ka launa ʻana me ko laila poʻe. Akā, ua ʻokoʻa iki ka naʻau ʻoiai ua ʻike mākou, ʻo ia ka māhele hope no mākou ma kēia ʻohana holokai kikoʻī, ka ʻohana i hele a pili loa ma o nā hanana kūikawā hoʻi. Eia naʻe, ma ko mākou haʻalele hope ʻana iā Māmā Hōkūleʻa no ka hele ʻana i ka mokulele, ua lele haʻahaʻa loa mai he ʻekolu manu ʻiwa a puni o Hōkūleʻa. Ua kokoke loa i hiki ke ʻike ʻia i loko o ko lākou mau maka, a ua ʻike mākou, ua pono nā mea a pau.
Ua nui a lehulehu nā mea i ʻike maka ʻia, a nui hou aku nā mea i ʻike naʻau ʻia, akā ʻaʻole i lawa nā ʻaoʻao o kēīa ʻatikala e wehewehe aku ai i ia mau nai, a no laila e mālama ʻia no kekahi moʻolelo i kēia mua aku. Mahalo ka ʻae ʻana mai iaʻu e kaʻanalike i kēia me ʻoukou.
No ka ʻikepili hou aku, e kipa iā www.hokulea.com
Nā Mokupuni I Kipa ʻIa:
Tautira
*Maiao
Moʻorea
Raiatea
Huahine (Haapu, Fare)
Tahaʻa (Mokupuni/Kaona)
Borabora (Motu/Kaona)
Maupiti
Borabora
*Mitiaro
*Atiu
Rarotonga
Aitutaki
*Palmerston
Taʻu
Ofu
*Olosenga
Pagopago
*Kaʻalo, pae ʻole
