Ua hoʻomaka ke aukahi hoʻokele waʻa Hawaiʻi ma ke ʻano he hoʻokolohua ʻepekema a pilikanaka. Ua hoʻokumu ʻia ka Polynesian Voyaging Society (PVS) ma ka makahiki ʻUmikumamaiwakanahikukumamakolu e Ben Finney he hulikanaka, Herb Kawainui Kāne he mea pāheona Hawaiʻi, a me Tommy Holmes he holokai a heʻenalu. ʻO ka hana mua, ʻo ia hoʻi ke kāpili ʻana i waʻa kaulua holo kai uli ʻoiai ʻaʻole i loaʻa ia ʻano waʻa e holo ana ma Hawaiʻi no ʻeono haneli a ʻoi paha makahiki. Ua kāpili ʻia kēia waʻa no ka hōʻoia ʻana i ka hiki i ka Hawaiʻi kahiko ke holo ma waena o Hawaiʻi a me ko Kahiki ma ke ʻano o nā kūpuna i palapala ʻia ma nā moʻolelo a me nā mele kahiko, a ʻaʻole i hōʻea wale i Hawaiʻi ma ke ʻano he ulia e like me ka manaʻo o ka haole. Eia nō naʻe, no nā Hawaiʻi i komo piha ma ke kāpili waʻa a me ka hoʻomākaukau ʻana no ka holo i Kahiki, ʻaʻole ia he hoʻokolohua, he kumu haʻaheo ia no ko Hawaiʻi a puni.
Ma ka lā ʻewalu o Malaki, makahiki ʻUmikumamaiwakanahikukumamalima, ua hānau ʻia ʻo Hōkūleʻa. Ma Hakipuʻu Hawaiʻi i hoʻolana a hoʻolaʻa ʻia ai ka waʻakaulua mua o kēia wā. He ʻumi anana kona lōʻihi a he ʻekolu anana kona ākea. He ʻumikūmālua a i ka ʻumikūmāhā holo kai ka nui o ke kime holo. No kēia waʻa kaulua hou, ua hoʻolālā ʻia he hoʻokahi wale nō huakaʻi holopuni i Kahiki, me ka manaʻo, ke hoʻi, ua pau ka hoʻokolohua, a ua pau ka holo ʻana. Eia nō naʻe ua hānau ʻia ʻo Hōkūleʻa he mea ola, ʻaʻole nō i pau ka holo ʻana ma ia huakaʻi hoʻokahi. Ua hoʻomau ʻia ka holo ʻana, a ua lilo ʻo Hōkūleʻa he kiʻi nui o ka haʻaheo o ko Hawaiʻi. Mai ia huakaʻi mua a hiki i kēia manawa ua holo ʻo Hōkūleʻa he hoʻokahihanelikanakolukaukani mile (130,000nm). Ua wehe ʻia nā kihi ʻekolu o ka "Huinakolu Polenekia" ʻO Hawaiʻi ʻoe, ʻo Aotearoa ʻoe, ʻo Rapanui ʻoe. A ua holo ʻia nā moku o ia huanakolu. Ua kipa pū ʻia nā kihi o ka Pākīpika, ʻo Alaka, ʻo ʻAmelika ʻĀkau, ʻo Iapana. Ua mahalo ʻia pū ko kākou poʻe kūpuna ma o ka holo ʻana i nā moku kūpuna o Papahānaumokuākea e like me Nihoa, a me Mokumanamana mā ma ka huina Hoʻolua o kākou. A ua holo i ka ʻāina o ko kākou kumu nui a kumu hiwahiwa ʻo Pius "Papa Mau" Piailug, ʻo ia hoʻi ka mokupuni ʻo Satawal ma Mikonesia. Ua holo ʻia nō ka Pākīpika a kamaʻāina.
[[{"fid":"62213","view_mode":"media_original","fields":{"format":"media_original","field_file_image_alt_text[und][0][value]":"","field_file_image_title_text[und][0][value]":"","field_caption[und][0][value]":"","field_copyright[und][0][value]":"","taxonomy_vocabulary_16[und]":"_none","field_media_page[und]":"1","field_folder[und]":"3046","field_tags[und]":""},"type":"media","link_text":null,"attributes":{"height":298,"width":530,"class":"media-element file-media-original"}}]]
Ma ka makahiki ʻeluakaukani-ʻehiku, ma ka hoʻi ʻana ʻo Hōkūleʻa i Hawaiʻi mai Iapana mai, ua hui nā alakaʻi o ka ʻOhana Waʻa* (he hui o nā alakaʻi o nā papahana holokai Hawaiʻi i hoʻokumu ʻia ma ka mh. 2006) a ua hoʻomaka ʻia ka hoʻolālā ʻana no kekahi huakaʻi i like ʻole kona nui a paʻakikī me nā huakaʻi i hana mua ʻia. Ua hoʻoholo ʻia ka holo ʻana a puni ka honua. Ma kēia huakaʻi a puni ka honua e holo ʻia ana he kanahākūmāhiku kaukani mile, a e kipa ʻia ana he kanawalukūmālima awa ma ʻiwakāluakūmāono mau ʻāina kahiki. No nā ʻāpana holo a pau, e pono ana he huina nui holokai he ʻekolu haneli, a e hoʻolako ʻia ana kēia huina nui mai ʻumikūmāono mau ʻāina. ʻOiai he huakaʻi lōʻihi ana kēia, e nui loa ana ka hana e hoʻomākaukau ai no kēia huakaʻi. Ua hoʻāno hou ʻia ʻo Hōkūleʻa. Ua wehe ʻia kona mau māhele a pau loa a i nā kaʻele hakahaka, a laila ua kāpili hou ʻia i ʻoi aku kona ikaika a me kona ākea i mākaukau no kēia mau kai malihini e komo ʻia ana. A ʻoiai he huakaʻi kēia e lōʻihi pū ana ma ka holo o ka manawa, he ʻekolu makahiki ka lōʻihi ʻoiai e holo ana ka waʻa ma ka wā ʻino ʻole, ua pono e lako nā holokai paʻa a mākaukau he nui. A no ka hoʻomākaukau pono ʻana i nā holokai, ua hoʻonui ʻia ka wā aʻoaʻo a ua mālama ʻia he mau holo ʻana i ka moana lipolipo i mea e maʻa ai nā holokai i ka waʻa ma kona kino hou.
He huakaʻi nui kēia, eia naʻe, ʻaʻole i hoʻoholo ʻia kēia huakaʻi no ka holoholo wale ʻana nō. Ua loaʻa he mau kumu koʻikoʻi no ka holo ʻana. ʻOiai he poʻe noho mokupuni mākou, ua ʻike leʻa nō i ka pilina o mākou poʻe kānaka i ke ola pono o ka ʻāina a me ke kai. Ma ke ʻano he holokai, ʻike mākou ʻo ka waʻa ko mākou mokupuni, a ʻo nā mokupuni o Hawaiʻi, he mau waʻa ia. A no ke ola pono ma kēia waʻa, ʻo ka mālama ʻana kekahi i kekahi, me ka mālama pū ʻana i ka waʻa a me ke kai a puni ka mea i pono ai ke ola. Me ia manaʻo, e pono ana kākou a pau e mālama i kēia mokupuni hoʻokahi a kākou e noho nei, ʻo ka honua nō ia. A no laila ma o kēia holo ʻana a puni ka honua, e kaʻanalike ʻana ko Hokūleʻa i nā haʻawina a mākou i aʻo ai, a e aʻo ana mākou mai ka poʻe e kipa ʻia ana mai nā wahi like ʻole, keu hoʻi nā ʻōiwi, i hiki ke ʻimi like ʻia ke ala e mālama pono i ke kai, a me ka honua hoʻi i mea e mau aku ai ke ola o nā hanauna a hanauna aku.
Ma ka makahiki ʻeluakaukani-ʻumikūmākolu, ua mālama ʻia ka māhele mua o ka holo a puni ka honua, ʻo ia hoʻi ua hoʻo mākou a puni o Hawaiʻi, a ua kapa ʻia kēia holo ʻana ʻo Mālama Hawaiʻi. He mea ʻōiwi nō ia ke kipa mua ʻana i ka ʻohana ma mua o ka huakaʻi ʻana aku i kahi mamao. He ala ia e ʻimi ʻia ke aloha, ke kākoʻo, a me ka mana o ka ʻohana no kēia holo kū i ka wā. A ke hoʻi, ʻo ke kaʻapuni ʻana iā Hawaiʻi ke pani o kēia huakaʻi, i mea e hoʻihoʻi ʻia ka ʻike a me ke aloha o ka honua i ko kākou poʻe.
He ʻatikala pōkole kēia e hōʻonoʻono ʻana kēia moʻolelo nui no ʻoukou e nā mea heluhelu. Ma nā pukana e hiki mai ana, e hahai ana kākou i kēia holo ʻana a puni ka honua me ke kaʻanalike ana i nā moʻolelo a me nā haʻawina o ka poʻe ʻōiwi e kipa ʻia ana. A e nānā pū ʻia ana ke kiʻi nui o ke aukahi holokai a hoʻokele waʻa ma Hawaiʻi nei a ma ka moana nui a puni kekahi. A no laila e nā hoa heluhelu... Mai! Mai! E huakaʻi like kākou!
* Nā Lālā ʻOhana Waʻa: Polynesian Voyaging Society, Friends of Hōkūleʻa & Hawaiʻiloa, Nā Kālaiwaʻa moku o Hawaiʻi, Nā Kālai Waʻa o Kauaʻi, Molokaʻi Voyaging ʻOhana, ʻImiloa, ʻAha Pūnana Leo-Honuakai Division, Haleʻiwa Voyaging ʻOhana, a me Hui O Waʻa Kaulua(Maui).
